Azərbaycanlılar kontent istehsalı üçün hazırlanan AI platformasına 85 min dollar yatırım edib, Microsoft və Cloudflare-dən dəstək alıblar
19 yaşında ABŞ-dan investisiya təklifini geri çevirən Teymur Kutseba illər sonra tərəfdaşları ilə birlikdə Azərbaycanda InnMedia adlı startapı təsis edib. Layihənin məqsədi kontent marketinqi və redaksiyaların iş proseslərini tam avtomatlaşdırmaqdır.
Digital Business və Astana Hub-ın birgə həyata keçirdiyi "Mərkəzi Avrasiyanın 100 startap hekayəsi" layihəsi çərçivəsində Teymur Kutseba InnMedia platformasının necə işlədiyindən, startapların niyə öz böyük dil modellərini (LLM) yaratmağa ehtiyac duymadığından, AI axtarış nəticələrində görünmək üçün məzmunun necə hazırlanmalı olduğundan və şirkətin hansı strategiya ilə yeni bazarlara çıxmağı planlaşdırdığından danışıb.
"19 yaşımda artıq Silikon Vadisində işləyə bilərdim"
– Özünüz haqqında danışın. InnMedia-dan əvvəl nə ilə məşğul olmusunuz?
– 2014-cü ildə Azərbaycan Dövlət Neft və Sənaye Universitetinin Biotibbi Mühəndislik ixtisasını bitirmişəm. Daha sonra MBA təhsili almış, Yeni Zelandiyanın University of Waikato universitetində böyük verilənlərin (Big Data) vizuallaşdırılması üzrə onlayn proqramı tamamlamışam. Bununla belə, peşəkar fəaliyyətim həmişə texnologiya, satış, marketinq və idarəetmənin kəsişməsində formalaşıb.
Karyerama endirim və kuponlar təqdim edən BeSmart onlayn platformasında satış sahəsində başlamışam. Daha sonra Lalafo marketplace-inin Azərbaycanda fəaliyyətə başlamasında iştirak etmiş, həmçinin Carlsberg şirkətində analitik kimi çalışmışam.
Bir neçə il IFRC – Beynəlxalq Qızıl Xaç və Qızıl Aypara Cəmiyyətləri Federasiyasının müxtəlif bölmələrində fandreyzinq, marketinq və rəqəmsal məhsullar istiqamətində fəaliyyət göstərmişəm. Ora qoşulmaq qərarım daha çox emosional idi – həmin dövr həm COVID-19 pandemiyasına, həm də regiondakı hərbi hadisələrə təsadüf edirdi.
Eyni zamanda startaplar və şəxsi biznes layihələrimi də inkişaf etdirirdim. Yeri gəlmişkən, ilk pitch təqdimatımı 2012-ci ildə Silikon Vadisində yerləşən Google ofisində etmişəm.
– Bunlar hansı startaplar idi və Google-a necə çıxış imkanı əldə etdiniz?
– Rozetkadan istifadə etmədən, insanın yeriyərkən yaranan kinetik enerjisi hesabına powerbank-ları enerji ilə doldurma üsulu hazırlamışdım. Bu layihə ilə Azərbaycanda keçirilən bir neçə startap müsabiqəsinin qalibi olduq və bizi ABŞ-a təcrübə proqramına göndərdilər.
Səfər zamanı Oracle və MIT-də olduq, lakin vaxtımızın böyük hissəsini Silikon Vadisindəki Google ofisində keçirdik. İlk dəfə məhz orada investorlar qarşısında ingilis dilində pitch təqdimatı etdim.
– O startap uğur qazanmadı?
– ABŞ-da avadanlıq (hardware) istehsalı ilə məşğul olan bir şirkət layihəyə maraq göstərmişdi. Mənə ABŞ-a köçməyi təklif etdilər. Yaşayış, köçürülmə və bütün texniki xərcləri qarşılayır, eyni zamanda layihənin inkişafına investisiya yatırmağa hazır idilər. Planları layihəni tam almaq və məni CEO kimi komandada saxlamaq idi.
Amma mən, əksər yeni startap təsisçiləri kimi, ideyamın dəyərini həddindən artıq yüksək qiymətləndirirdim. Milyonlarla dollar istəyirdim, lakin belə bir təklif gəlmədi. Mən də bildirdim ki, "yeməyə işləməkdənsə", layihənin bütün çertyojlarını internetdə açıq şəkildə paylaşaram.
Bu gün geriyə baxanda anlayıram ki, necə böyük fürsəti əldən vermişəm. Mən artıq 19 yaşımda Silikon Vadisində işləyə bilərdim.
Ancaq o dövrdə bir qədər ərköyün idim. İdman sayəsində (akademik avarçəkmə üzrə yeddiqat Azərbaycan çempionu, gənclər arasında Avropa çempionu və dünya çempionatının finalçısı olmuşam) hər ay yarımdan bir müxtəlif ölkələrə səfər edir, demək olar ki, dünyanın yarısını gəzirdim. Buna görə də ABŞ-a köçməyi o vaxt həyatımın ən böyük fürsəti kimi qiymətləndirmirdim.
"Jurnalist jurnalist olaraq qalmalıdır, prompt mühəndisliyi üzrə mütəxəssisə çevrilməməlidir"
– InnMedia ideyası necə yarandı?
– 2020-ci ildə marketinq agentliyi yaratdım. Həmin vaxt absurd bir mənzərə ilə qarşılaşdım: dünyanın əksər media qurumları hələ də köhnəlmiş iş prosesləri ilə fəaliyyət göstərir. Bir vahid kontentin hazırlanması üçün müxtəlif alətlərə və mütəxəssislərə ehtiyac yaranır: biri məlumat toplayır, digəri onu yoxlayır, üçüncüsü mətni yazır, dördüncüsü tərcümə edir... Sonra dizayner maket hazırlayır, operator videonu çəkir, montajçı onu montaj edir və bu zəncir davam edir.
Nəticədə yaradıcı işə sərf olunan vaxtdan daha çox vaxt məlumatın bir əməkdaşdan digərinə ötürülməsinə gedir.
Mən də düşündüm: əgər avtomobil istehsalı, logistika və maliyyə əməliyyatları avtomatlaşdırılırsa, bəs niyə kontent istehsalı demək olar ki, olduğu kimi qalır?
Beləliklə, 2023-cü ildə InnMedia ideyası yarandı.
– InnMedia-nın əsas mahiyyəti nədən ibarətdir? Layihə hansı problemi həll edir?
– Bu gün şirkətlər mətn, şəkil, video və səsləndirmə üçün müxtəlif AI modellərindən istifadə edir. Bunun üzərinə məzmunun dərc olunması üçün CMS, sənədlərin saxlanılması üçün ERP, müştərilərin idarə olunması üçün CRM, bulud yaddaşı, analitika və kontentin yayımı üçün əlavə sistemlər də gəlir.
Nəticədə idarə olunması çətin olan, bir-biri ilə əlaqəsiz çoxsaylı alətlərdən ibarət mürəkkəb bir ekosistem yaranır.
InnMedia isə bütün bu prosesləri vahid platformada birləşdirir. Sistem informasiya səbəbini müəyyən edə, məlumat toplaya, onları təhlil edə, mənbələri yoxlaya, material hazırlaya, mətnin müxtəlif versiyalarını yarada, şəkil, audio və video hazırlaya, kontenti müxtəlif dillərə və platformalara uyğunlaşdıra, təsdiq üçün məsul şəxsə göndərə və daha sonra avtomatik şəkildə yayımlaya bilir.
Başqa sözlə, həll etdiyimiz əsas problem kontent istehsalındakı əməliyyat mürəkkəbliyidir. Bütün proseslər vahid dashboard üzərindən idarə olunur. Bu yanaşma maliyyə şöbəsinin də işini asanlaşdırır. Müxtəlif xidmətlər üzrə onlarla ayrı-ayrı abunə haqqı ödəmək əvəzinə, şirkət yalnız bir aylıq hesab-faktura ödəyir.
– Bu cür sistem kimlər üçün nəzərdə tutulub?
– Əvvəlcə məhsulu media və nəşriyyat sektoru üçün hazırlayırdıq. Lakin qısa müddətdə anladıq ki, auditoriyamız bundan qat-qat genişdir.
Bu sistem kontentin gündəlik əməliyyat prosesinin ayrılmaz hissəsi olduğu bütün təşkilatlar üçün uyğundur: media redaksiyaları, kommunikasiya agentlikləri, iri şirkətlərin marketinq departamentləri, super tətbiqlər (superapp), dövlət və kvazidövlət qurumları və s.
Məhsulumuz əsasən orta və iri biznes üçün nəzərdə tutulub. Həftədə Instagram-da iki paylaşım edən kiçik bir qəhvəxananın bizim platformaya ehtiyacı yoxdur. Bu, marketə tankla getmək kimi bir şey olardı.
– Şirkətlər InnMedia-dan necə istifadə edə bilərlər?
– Ticarət sektorundan bir nümunə gətirim. Tutaq ki, şirkət kataloquna bir neçə min yeni məhsul əlavə edib. Hər məhsul üçün təsvir, məhsul kartı, vizual materiallar, reklam mətnləri, qısa videolar və digər kontent hazırlanmalıdır.
InnMedia məhsul haqqında ilkin məlumatları götürərək şirkətin müəyyən etdiyi qaydalara uyğun bütün kontenti avtomatik yarada bilir.
Bir neçə brendi idarə edən reklam agentlikləri üçün isə platforma hər brendin fərqli tone of voice, vizual standartları, məhsul xüsusiyyətləri və təsdiqləmə prosedurlarını nəzərə alaraq materiallar hazırlaya bilir.
Dövlət qurumlarında isə InnMedia rəsmi sənəd əsasında avtomatik olaraq press-reliz, FAQ bölməsi, sosial media paylaşımları, infoqrafika, audio versiya və müxtəlif dillərdə materiallar hazırlayır.
– Bu prosesdə insanın rolu nədir? Prompt yazır?
– Platformanı hazırlayarkən belə bir prinsipdən çıxış etdik: hər kəs öz işi ilə məşğul olmalıdır. Jurnalist jurnalist olaraq qalmalıdır, prompt mühəndisliyi üzrə mütəxəssisə çevrilməməlidir. İstifadəçi AI ilə birbaşa ünsiyyət qurmur və prompt yazmır. Bütün bu proseslər artıq sistemin daxilində qurulub. İstifadəçi sadəcə interfeysə daxil olur və onu yoxlamalı, lazım gəldikdə düzəliş etməli və təsdiqləməli olduğu hazır kontenti görür.
Lakin bunun mümkün olması üçün əvvəlcə sistem konkret şirkətin ehtiyaclarına uyğun şəkildə konfiqurasiya edilir. Biz şirkətin daxili qaydalarını toplayır, tone of voice-unu öyrənir, kontentə dair tələbləri, məlumat mənbələrini və təsdiqləmə prosedurlarını analiz edirik. Bundan sonra AI modellərinin işi, məlumatların saxlanma infrastrukturu, emal mexanizmləri və təhlükəsizlik parametrləri uyğunlaşdırılır.
Bundan əlavə, hər təşkilat üçün vacib olan məlumat mənbələrini platformaya inteqrasiya edirik. Media redaksiyaları üçün bunlar dünya mediasının xəbər lentləri, dövlət portalları və qanunvericilik bazaları ola bilər. Biznes üçün isə daxili sənədlər, məhsul kataloqları, CRM və digər korporativ sistemlər. Platforma bütün bu mənbələri 24/7 rejimində izləyə və lazımi prosesi avtomatik işə sala bilir. Məsələn, mühüm xəbər yayımlandıqda redaktor üçün material hazırlayır, yeni məhsul əlavə olunduqda isə avtomatik olaraq məhsul təsviri, vizual materiallar və müxtəlif kanallar üçün mətnlər yaradır.
– Hazırlanan kontentin keyfiyyəti nə dərəcədə yüksək olur?
– Birinci və ən vacib mərhələ məlumatın doğruluğunun yoxlanılmasıdır. Bu proses bizdə on mərhələdən ibarətdir. AI məlumatı təhlil edir, onu digər mənbələr və sosial şəbəkələrdəki informasiyalarla müqayisə edir. Məlumat təsdiqlənərsə, xəbər etibarlı kimi işarələnir, təsdiqlənməzsə, sistem tərəfindən avtomatik şəkildə kənarlaşdırılır.
Yalnız bundan sonra kontentin yaradılması mərhələsi başlayır. Mətn redaksiya siyasəti, üslub, tonalıq və icazə verilən leksika nəzərə alınmaqla dərhal tələb olunan dillərdə hazırlanır. Elə bu mərhələdə AI axtarış sistemləri üçün optimizasiya — GEO (Generative Engine Optimization) də həyata keçirilir.
– Niyə məhz GEO optimizasiyasına bu qədər önəm verirsiniz?
– Bu gün kontentin istehlak modeli tamamilə dəyişib. SEO artıq əvvəlki effektivliyini itirib, orqanik trafik azalır və bu tendensiya davam edəcək. İstifadəçilər isə məlumatı getdikcə daha çox AI sistemlərinin təqdim etdiyi cavablardan əldə edirlər. Bir çox şirkət materiallarını AI üçün optimallaşdırmağa çalışır, lakin bu, əksər hallarda nəticə vermir. Çünki GEO optimizasiyası yalnız mətn yaradılan anda mümkündür. Səbəb sadədir: AI sistemləri istifadəçinin sualına cavab verərkən hesablama resurslarını və token sərfiyyatını minimuma endirməyə çalışır. Əgər mətn əvvəlcədən modelin öyrəndiyi struktur və nümunələrə uyğun qurulmayıbsa, AI onu sadəcə nəzərə almır. Biz InnMedia-da böyük dil modellərinin (LLM) öyrədildiyi məlumat strukturları ilə təbii şəkildə uyğunlaşan kontent yaradırıq. Bu isə materiallarımızın AI tərəfindən hazırlanmış cavablarda görünmə ehtimalını əhəmiyyətli dərəcədə artırır.
"Öz AI modelini yaratmağın kommersiya baxımından mənası yoxdur"
– InnMedia üzərində sizinlə birlikdə daha kimlər çalışır?
– Məndən başqa InnMedia-nın daha iki həmtəsisçisi var. Onlar ictimaiyyət qarşısında görünməyi üstün tutmurlar. Komandamızda səriştələr aydın şəkildə bölünüb və bu, əsas istiqamətləri effektiv şəkildə idarə etməyə imkan verir. Həmtəsisçilərdən biri İT sahəsində 15 illik təcrübəyə malikdir, digəri isə neft sektorundan gələn maliyyə mütəxəssisidir.
Hazırda 10 nəfərlik daimi komandamız var. İş yükünün artdığı dövrlərdə isə frilanserlərin hesabına əməkdaşların sayı 20 nəfərə qədər yüksəlir.
– Hansı LLM-lərdən istifadə edirsiniz?
– Biz OpenAI, Google, xAI, Anthropic və DeepSeek kimi aparıcı AI şirkətlərinin hazırladığı modellərlə işləyirik. Lakin InnMedia-nın əsas üstünlüyü konkret bir modeli istifadə etməsində deyil, müxtəlif LLM-lərin orkestrasiya olunmasındadır. Yəni hansı modelin, hansı mərhələdə, hansı kontekst və hansı məlumat mənbələri əsasında konkret tapşırığı yerinə yetirməli olduğunu sistem özü müəyyən edir. Microsoft Azure ekosistemi üzərində qurulmuş, AI orkestrasiyası vasitəsilə kontentin konveyer prinsipi ilə istehsalı və emalını təmin edən texnologiyamız üçün hazırda Mərkəzi Asiyanın bir neçə ölkəsində beynəlxalq patent müraciəti edirik. Bu, texnologiyamızı mümkün kopyalanmalardan qorumağa imkan verəcək.
– Niyə məhsulu mövcud LLM-lər üzərində qurmağa qərar verdiniz? Niyə öz modelinizi hazırlamadınız?
– Buna ehtiyac görmürük. Öz böyük dil modelini yaratmaq on milyonlarla dollar investisiya, təxminən otuz yüksək ixtisaslı mütəxəssisdən ibarət komanda və bir neçə illik inkişaf prosesi tələb edir. Ən vacibi isə odur ki, bunun kommersiya baxımından məntiqi yoxdur. Çünki AI sənayesi həddindən artıq sürətlə inkişaf edir.
Biz bazarda mövcud olan ən güclü həllərdən istifadə edirik. Bunu avtomobil nümunəsi ilə izah etsək, LLM avtomobilin mühərrikidir və həmin mühərrik aparıcı istehsalçı tərəfindən daim təkmilləşdirilir. Mühərrik inkişaf etdikcə avtomobil də yaxşılaşır və bunun üçün bizim əlavə resurs sərf etməyimizə ehtiyac qalmır.
– Məhsulun hazırlanması zamanı ən çətin məqam nə idi?
– Ən böyük çətinlik AI-yə məqalə yazmağı öyrətmək deyildi. Əsas məsələ etibarlı və dayanıqlı sistem qurmaq idi. Mənbələrlə necə işləmək lazımdır? Məzmunun təkrarlanmasının qarşısını necə almaq olar? Çoxdilli prosesləri necə təşkil etmək olar? Təhlükəsizliyi necə təmin etmək lazımdır? Xidmətlərdən biri əlçatan olmadıqda sistem necə davranmalıdır? Hansı mərhələdə insan müdaxiləsi və təsdiqi tələb olunur? Bu sualların hər biri üzərində ciddi işləmək lazım gəldi və onların həlli heç də asan olmadı.
İkinci böyük çətinlik isə texnologiyanın hazırlanması ilə deyil, potensial müştərilərlə işləmək prosesi ilə bağlı idi. Nədənsə bir çox şirkət hesab edir ki, AI tətbiqi sadəcə bir neçə ChatGPT abunəliyi almaqdan ibarətdir. Bəzi hallarda isə uzun müddət izah etməli olurduq ki, ChatGPT kimi AI alətindən istifadə etməklə şirkətin biznes proseslərinə AI-nin tam inteqrasiyası arasında çox böyük fərq var.
"Startapın ilkin mərhələsində təsisçi müştərilərlə şəxsən özü danışmalıdır"
– Hazırda InnMedia-dan kimlər istifadə edir?
– Hazırda həm özəl şirkətlərdən, həm də dövlət sektorundan sifarişlər alırıq. Müqavilələrimizdə NDA (Məxfilik Müqaviləsi) ilə bağlı bənd çox sərtdir. Buna görə də müştərilərimizin adlarını açıqlaya bilmirəm. Yalnız onu deyə bilərəm ki, onların arasında təhlükəsizlik sahəsində fəaliyyət göstərən bir dövlət qurumu, böyük bir superapp, bir neçə tanınmış media qurumu, eləcə də B2B və B2C sektorunda çalışan, media resurslarından öz biznesləri ətrafında ictimai rəy formalaşdırmaq üçün istifadə edən şirkətlər var.
Bundan başqa, TECHXƏBƏR adlı öz media portalımız da fəaliyyət göstərir. Burada yeni texnologiyalarımızı sınaqdan keçirir və platformanın imkanlarını nümayiş etdirmək üçün onu bir növ şourum kimi istifadə edirik.
Hazırda Qazaxıstandakı tibbi klinikalar şəbəkəsi, alkoqol sənayesinin nümayəndələri, bir tanışlıq platforması və iri e-commerce aqreqatoru ilə danışıqlar aparırıq. Əslində, InnMedia-nın tətbiq sahəsi çox genişdir. Platforma istənilən sektorda istifadə oluna bilər - istər xəbərlərin hazırlanması, istər məhsul kartlarının yaradılması, istərsə də tanışlıq platformaları üçün profil məzmununun hazırlanması məqsədilə.
Real layihələr əsasında hesabladığımız göstəricilər göstərir ki, InnMedia bir vahid kontentin hazırlanma xərclərini 62 dəfə azaldır, istehsal sürətini isə 24,6 dəfə artırır. Bunun nəticəsində kontentin dəyəri 70% azalır və çoxformatlı bir kontent vahidinin hazırlanması 2,69 ABŞ dollarından başlayır. Eyni zamanda CAC (Customer Acquisition Cost - müştərinin cəlb edilmə dəyəri) 2–4 dəfə aşağı düşür.
– Əgər siz "kontent fabriki" yaratmısınızsa, niyə media bazarını özünüz fəth etmirsiniz?
– Bunun iki yolu var. Ya dünyanın ən böyük kontent fabriklərindən birini qurursan, ya da minlərlə fabrikin istifadə edəcəyi avadanlığı istehsal edirsən. Biz ikinci yolu seçmişik. Çünki kontentin istehsalı, idarə olunması və distribusiyası üçün infrastruktur bazarı qlobal miqyasda media bazarından qat-qat böyükdür.
– İlk müştəriləri necə tapdınız? Hazırda hansı kanallardan istifadə edirsiniz?
– İlk əlaqələrimiz şəxsi tanışlıqlar və birbaşa satışlar vasitəsilə yaranıb. Mən hesab edirəm ki, startapın ilkin mərhələsində bu, ən düzgün yanaşmadır. Təsisçi müştərilərlə şəxsən özü danışmalıdır. Əks halda, bazarın real problemi ilə məhsul arasında həddindən artıq çox vasitəçi yaranır.
Hazırda isə bütün mümkün kanallardan istifadə edirik. LinkedIn, Instagram, ortaq tanışlar və digər əlaqələr vasitəsilə qərar qəbul edən şəxslərlə əlaqə qururuq, eyni zamanda ixtisaslaşmış konfranslarda fəal iştirak edirik. Artıq word-of-mouth effekti də özünü göstərməyə başlayıb. Son vaxtlar Qırğızıstan və Azərbaycandan bir sıra şirkətlər bizə məhz tövsiyə əsasında müraciət ediblər.
Bundan əlavə, iri sistem inteqratorları və İT distribütorları ilə tərəfdaşlıq şəbəkəsini genişləndiririk. Müəyyən ölkələr üzrə satış lisenziyaları təqdim edirik. Hazırda isə bu sahədə fəaliyyət göstərən dünyaca məşhur bir brendlə əməkdaşlıq imkanlarını müzakirə edirik.
"Platforma 24/7 işləyir, xəstələnmir və işdən çıxmır"
– Monetizasiya modeliniz necə qurulub?
– Bizim bir neçə monetizasiya səviyyəmiz var: Birinci mərhələ platformanın inteqrasiyası və tətbiqidir. İkinci mərhələdə isə müştəri istifadə etdiyi resurslara uyğun olaraq müntəzəm ödəniş edir. Bundan əlavə, həllimizi white label modeli ilə də təqdim edə bilirik. Bu halda platforma başqa brendlərin adı altında istifadə olunur. Digər bir model isə infrastruktur yanaşmasıdır. Bu zaman InnMedia-nın ayrı-ayrı funksiyaları başqa bir məhsulun tərkib hissəsinə çevrilir. Məlumat təhlükəsizliyi və məlumatlara nəzarətlə bağlı yüksək tələbləri olan təşkilatlar üçün isə platformanı onların öz serverlərində yerləşdirmək imkanımız da var.
– Platformadan istifadənin orta aylıq dəyəri nə qədərdir?
– Qiymət hər müştəri üçün fərdi qaydada hesablanır. Burada trafik həcmi, serverlərə düşən yük və təhlükəsizlik tələbləri əsas rol oynayır. Orta hesabla sistemimiz 10 nəfərin gördüyü işi əvəz edir, lakin onun dəyəri cəmi 4–5 əməkdaşın əməkhaqqısına bərabər olur. Üstəlik, platforma 24/7 rejimində işləyir, xəstələnmir, işdən çıxmır və ayrıca iş yeri tələb etmir.
Rəqəmlərlə ifadə etsək, B2B seqmentində platformadan istifadənin aylıq qiyməti 2 min ABŞ dollarından başlayır.
– Hazırda gəlirləriniz hansı səviyyədədir?
– Dəqiq rəqəmi açıqlamaq istəmirəm. Hazırda erkən kommersiyalaşma və miqyaslanma mərhələsindəyik. Bundan əlavə, əldə etdiyimiz gəlirin əhəmiyyətli hissəsini yenidən məhsulun inkişafına, infrastrukturun gücləndirilməsinə və yeni bazarlara çıxışın sürətləndirilməsinə reinvestisiya edirik. Hazırda əsas məqsədimiz mümkün qədər sürətli böyüməkdir.
– Artıq investisiyaların geri dönüş nöqtəsinə (break-even) çata bilmisiniz?
– Əgər ilkin tədqiqat və inkişaf (R&D) xərclərini nəzərə almasaq, əməliyyat baxımından demək olar ki, zərərsizlik nöqtəsinə çatmışıq. Bunun üçün cəmi daha 2–3 iri müqavilənin imzalanması kifayət edəcək. Bununla belə, tədqiqat və inkişaf mərhələsinə qoyulan ilkin investisiyalar hələ tam geri qayıtmayıb. Buna görə də yatırılan vəsaitin tam şəkildə geri dönüşü üçün bir qədər də vaxt tələb olunacaq.
"Bu startap Google, Microsoft, Amazon, NVIDIA və ya qlobal media holdinqi tərəfindən alınacaq bir 'unicorn'a çevriləcək"
– Startapa indiyədək nə qədər investisiya yatırılıb?
– Ümumilikdə layihəyə 85 min ABŞ dollarından çox investisiya qoyulub. Bunun təxminən 35 min dolları şəxsi vəsaitim, qalan 50 min dolları isə mələk investorların (angel investors) yatırımlarıdır.
Bundan əlavə, ciddi infrastruktur dəstəyi də əldə etmişik. Microsoft for Startups proqramı çərçivəsində 150 min dollarlıq Azure kreditləri, Cloudflare for Startups proqramı vasitəsilə isə 25 min dollarlıq Cloudflare kreditləri almışıq.
– Hazırda layihənin yeni investisiyaya ehtiyacı varmı?
– Növbəti mərhələdə SAFE (Simple Agreement for Future Equity) müqaviləsi vasitəsilə təxminən 250 min ABŞ dolları həcmində investisiya raundu cəlb etməyi planlaşdırırıq. SAFE mexanizmi investorun bu gün startapa vəsait yatıraraq gələcəkdə şirkətdə pay əldə etmək hüququ qazanmasına əsaslanır. Bu investisiyaya əsas ehtiyacımız miqyaslanmanı sürətləndirməkdir. Hazırda bizim üçün ən vacib məsələ bazarlara mümkün qədər sürətli daxil olmaqdır.
– Hansı bazarları hədəfləyirsiniz?
– Hazırda Azərbaycanda fəaliyyət göstəririk və Qazaxıstan bazarına daxil oluruq. Növbəti mərhələdə isə Özbəkistan, Qırğızıstan, Gürcüstan və Türkiyədə miqyaslanmağı planlaşdırırıq. Bu bazarları həm mədəni, həm də əməliyyat baxımından yaxşı anlayırıq. Ekspansiyaya daha yaxşı hazırlaşmaq və yerli startap ekosistemləri ilə əlaqələri gücləndirmək məqsədilə hazırda Astana Hub və Google for Startups tərəfindən həyata keçirilən beynəlxalq akselerasiya proqramı Silkway Accelerator-un yeddinci axınında iştirak edirik.
Regional mərhələ üçün təxminən 6 ay vaxt nəzərdə tutmuşuq. Bundan sonra daha geniş beynəlxalq bazarlara çıxmağı planlaşdırırıq. Son hədəfimiz isə Avropa İttifaqı, Çin və ABŞ bazarlarıdır.
– Əsas rəqibləriniz kimlərdir?
– Əksər şirkətlər bizimlə yalnız dəyər zəncirinin müəyyən hissəsində rəqabət aparırlar. Məsələn, Jasper bu gün marketinq komandaları üçün AI platforması və AI agentləri inkişaf etdirir. Arc XP redaksiya və nəşriyyat mühitinə AI köməkçiləri inteqrasiya edir. Brightspot isə CMS və rəqəmsal nəşriyyat platformaları daxilində AI funksiyalarını inkişaf etdirir.
Mərkəzi Asiyada isə bu nişdə fəaliyyət göstərən yeganə startap bizik. Hazırda regionda konsepsiyamıza tam uyğun gələn birbaşa rəqib görmürəm.
– Bir neçə ildən sonra InnMedia-nı harada görürsünüz?
– Məqsədimiz Google, Microsoft, Amazon, NVIDIA və ya qlobal media holdinqlərindən biri tərəfindən satın alınacaq bir "unicorn" yaratmaqdır. Bunun üçün artıq dəqiq exit strategiyamız formalaşıb və şirkətin potensial alıcı üçün hansı üstünlüklərlə cəlbedici ola biləcəyini aydın şəkildə müəyyənləşdirmişik.